Famed chef Zubaida Tariq passes away in Karachi

معروف شیف، میزبان اور ماہر امور خانہ داری زبیدہ طارق کراچی میں انتقال کر گئیں۔
زبیدہ طارق کے انتقال کی تصدیق ان کے بھائی معروف مصنف انور مقصود نے کی۔

انہوں نے بتایا کہ ان کی بہن کچھ عرصے سے علیل تھیں، ان کا نماز جنازہ آج بعد نماز جمعہ ڈیفنس کی سلطان مسجد میں ادا کی جائے گی۔

زبیدہ آپا کے نام سے مشہور زبیدہ طارق 4 اپریل 1945 کو حیدرآباد دکن میں پیدا ہوئیں، 1947 میں تقسیم ہند کے بعد ان کا خاندان پاکستان منتقل ہوگیا۔

زبیدہ طارق کی شہرت کی ایک وجہ اُن کے وہ ٹوٹکے بھی تھے جو وہ اپنے ٹی وی پروگرامز کے دوران ناظرین کو بتایا کرتی تھیں۔

انہوں نے دو دہائیوں قبل کوکنگ ایڈوائزر کی حیثیت سے شوبز میں قدم رکھا اور اپنے کوکنگ شوز کے ذریعے مقبولیت حاصل کی۔

زبیدہ طارق جس خاندان سے تعلق رکھتی تھیں اس کا حصہ پاکستان کی مایہ ناز مصنفہ فاطمہ ثریا بجیا، منفرد لہجے کی شاعرہ زہرہ نگاہ اور ہر خاص و عام میں مقبول قلمکار، شاعر، مزاح نگار، مصور اور اداکار انور مقصود بھی ہیں۔