پہلے ہانیہ اب میرب۔۔ عاصم اظہر نے منگنی توڑ دی! سوشل میڈیا پر پوسٹ وائرل

Asim Azhar And Merub Ali Announce Breakup

عاصم اظہر نے اپنی انسٹاگرام اسٹوری کے ذریعے ایک جذباتی پیغام میں یہ تصدیق کر دی کہ وہ اور اُن کی منگیتر میرب علی اب ساتھ نہیں رہے۔ ایک وقت تھا جب ان کی جوڑی کو سوشل میڈیا پر "پرفیکٹ کپل" کہا جاتا تھا، لیکن اب، 2022 کی اس منگنی کا اختتام ایک باوقار علیحدگی پر ہوا۔

عاصم نے اپنی پوسٹ میں لکھا:

"ہم نے یہ پیغام شیئر کرنے کا فیصلہ اس لیے کیا کیونکہ ہم سمجھتے ہیں کہ آپ، جو ہمیں اتنی محبت دیتے ہیں، سچ جاننے کے حق دار ہیں۔ کافی سوچ بچار کے بعد ہم دونوں نے باہمی اتفاق سے اپنی راہیں الگ کرنے کا فیصلہ کیا ہے۔ ہم نے ایک خوبصورت وقت ساتھ گزارا، خواب دیکھے، لیکن کبھی کبھی زندگی وہ راستہ اختیار کر لیتی ہے جو ہمارے منصوبوں سے مختلف ہوتا ہے۔"

ان کے الفاظ میں دکھ بھی تھا اور نرمی بھی، جیسے وہ مداحوں کو یہ باور کرانا چاہتے ہوں کہ الگ ہونے کا مطلب نفرت نہیں۔ انہوں نے کہا کہ وہ ایک دوسرے اور اپنے خاندانوں کے لیے دل سے عزت کا جذبہ رکھتے ہیں، اور یہ احترام ہمیشہ باقی رہے گا۔

اس اعلان کے بعد عاصم نے میرب کے ساتھ سوشل میڈیا پر موجود تمام تصاویر اور پوسٹس بھی ہٹا دی ہیں، جس سے ظاہر ہوتا ہے کہ وہ اس مرحلے کو مکمل طور پر بند کرنا چاہتے ہیں۔

یہ پہلی بار نہیں کہ عاصم اظہر کی ذاتی زندگی خبروں میں آئی ہو۔ ان کے اور ہانیہ عامر کے تعلقات بھی ماضی میں سوشل میڈیا پر بہت زیادہ زیرِ بحث رہے، اور اُس علیحدگی نے بھی کئی دل توڑے تھے۔

مداح اس نئی خبر پر افسوس کا اظہار کر رہے ہیں، مگر ساتھ ہی عاصم اور میرب دونوں کے لیے دعائیں بھی کر رہے ہیں کہ وہ اس نیا موڑ پُرسکون اور مثبت انداز میں عبور کریں۔

سچ یہی ہے: کبھی کبھار سب کچھ ہوتے ہوئے بھی، ساتھ چلنا ممکن نہیں ہوتا۔