جو بھی ہوگا ذمہ دار رابعہ انعم ہے.. ایک کے بعد ایک 3 شادیاں کیوں کیں؟ اشفاق ستی کا ویڈیو پیغام

"میں 17 سال بعد اپنی محنت سے اس مقام پر پہنچا تھا،م کسی سے مدد نہیں مانگی اس دوران آپ لوگوں کی جانب سے دی گئی محبت کا میں شکر گزار ہوں. کسی بھی معاملے پر مؤقف ہونا بہت ضروری ہے، ہرکہانی کے دورخ ہوتے ہیں۔ میرا میری اہلیہ کے ساتھ جھگڑا ہمارا نجی معاملہ تھا۔ ہر گھر میں میاں بیوی کا جھگڑا ہوتا ہے۔ اس معاملے کو بڑھاوا دے کر میری کردار کشی کی جارہی ہے. ایک شخص جو آج تک شریف تھا، اس کو اچانک درندہ بنادیا گیا ہے۔ میری ذاتی زندگی کو جگہ جگہ اچھالا جارہا ہے۔ ان معاملات پر بات کی جارہی ہے جس کو کوئی نہیں جانتا ہے. رابعہ انعم صاحبہ مجھے جس طرح ذاتی طور پر تنقید کا نشانہ بنا رہی ہیں، میں ان سے یہ کہتا ہوں کہ آپ میری کولیگ تھیں۔ آپ کے ساتھ میرا احترام کا رشتہ تھا۔ آپ نے اس سارے معاملے میں مجھے کوئی کال یا میسج کر کے میرا مؤقف جاننے کی کوشش نہیں کی اور آپ کے الفاظ کی وجہ سے میں اس وقت ذہنی اذیت میں ہوں"

یہ کہنا ہے نجی چینل کے معروف میزبان اشفاق اسحاق ستی کا جن پر گزشتہ دنوں ان کی دوسری اہلیہ نومائکہ ستی نے بدترین تشدد کے الزامات عائد کیے جس کے جواب میں اشفاق نے ویڈیو پیغام بنا کر اپنے سوشل میڈیا اکاؤنٹ پر شیئر کیا.

اشفاق کا کہنا تھا کہ ان کا اور ان کی بیوی نومیکا کے ساتھ جو بھی معاملہ ہے پولیس اس کی تفتیش کر رہی ہے۔ لیکن بلاوجہ میڈیا ٹرائل نہیں ہونا چاہئے۔ جب عدالتیں اپنا کام کررہی ہیں تو میڈیا کی عدالت نہ لگائی جائے. میری تیسری اہلیہ زارا انصاری کے رشتے کو غلط نام دیا جارہا ہے جبکہ ہماری شادی کو 3 سال ہوگئے ہیں اور ہمارا ایک پونے 2 سال کا بیٹا بھی ہے۔ زارا کو میری پچھلی شادیوں اور بچوں سے متعلق سب کچھ معلوم ہے. میں نومیکا کو زیادہ اہمیت دیتا تھا کیونکہ وہ میرے بچوں کے ساتھ رہ رہی تھیں. لیکن چھوٹے چھوٹے معاملے پر جھگڑا کرنا، بار بار اس بات کا تقاضہ کرنا کہ میں اپنی تیسری بیوی کو طلاق دے دوں یہ نہیں ہوسکتا. اشفاق ستی کا کہنا تھا کہ ان کی تین شادیوں کی وجہ ان کے بچے ہیں. پہلی شادی طلاق پر ختم ہوئی جس سے ان کے تین بچے تھے اور ان کی پرورش کے لئے ماں کی ضرورت تھی جس کے بعد انھیں دوسری اور پھر تیسری شادی کرنی پڑی.