کوئی مرد نہیں تھا جس سے شکایت کرسکتی۔۔ آمنہ الیاس یتیمی کے دکھ اور والد کی موت یاد کر کے رو پڑیں

"میرے والد کم عمری میں انتقال کر گئے تھے، ان کے انتقال کو 20 سال گزر چکے ہیں۔ اس وقت مجھے سمجھ نہیں تھی کہ موت کا مطلب کیا ہوتا ہے۔ والد کے جنازے کی تصاویر میرے پاس ہیں، جن میں میں مسکراتی نظر آتی ہوں، کیونکہ میں یہ نہیں جانتی تھی کہ میں نے کیا کھو دیا ہے،" اداکارہ آمنہ الیاس نے جذباتی ہوتے ہوئے نیو ٹی وی کے پروگرام 'زبردست' میں اپنی زندگی کے سب سے گہرے دکھ پر بات کی۔

انہوں نے اپنی والدہ کی قربانیوں کو یاد کرتے ہوئے کہا، "جب والد کا سایہ سر سے اٹھا، میری والدہ محض تیس کی دہائی میں تھیں۔ انہوں نے تن تنہا ہمیں پروان چڑھایا، بے پناہ مشکلات کا سامنا کیا، اور ہمارے لیے ہر ممکن قربانی دی۔ لیکن گھر میں مرد کے نہ ہونے کا احساس ہمیشہ غالب رہا، خاص طور پر جب کسی کے رویے کی شکایت کرنی ہوتی تھی یا کسی مشکل کا سامنا کرنا پڑتا تھا۔"

آمنہ نے مزید کہا، "میں بہت چھوٹی تھی جب والد ہمیں چھوڑ کر چلے گئے۔ آج بھی ان کی شفقت اور محبت کی کمی شدت سے محسوس ہوتی ہے، خاص طور پر ان لمحوں میں جب زندگی کا کوئی سخت مرحلہ آتا ہے۔ والد کے بغیر کا سفر بہت مشکل تھا، لیکن ان کی یاد ہمیشہ میری طاقت بنی رہی۔"