Anday Fridge Main Rakhne Chahiye Ke Nhe

انڈے فریج میں رکھنے چاہئیں یا باہر؟ ایسی معلومات جو بہت کم لوگ جانتے ہیں
بعض اَفراد کے ذہنوں میں یہ سوال گردش کرتا رہتا ہے کہ انڈے فریج میں رکھنا بہتر ہے یا پھر فریج سے باہر۔ یہ بات جان کر آپ کو حیرانی ہوگی کہ بیسویں صدی کے آغاز میں امریکہ، برطانیہ اور دیگر یورپی ممالک میں لوگ فریج میں انڈے نہیں رکھا کرتے تھے۔ آسٹریلیا سے انڈے برطانیہ کو برآمد کئے جاتے تھے لیکن ایک بار انڈوں میں گندگی کے باعث برطانیہ میں بیماری پھیل گئی تھی۔
یہ بات برطانیہ اور امریکہ میں لازمی قرار دے دی گئی کہ انڈوں کو ہر صورت میں دھونا ہوگا تاکہ بیماری سے بچا جاسکے۔ اب انڈوں کو سرف میں دھو کر یا صابن سے چمکا کر استعمال کیا جانے لگا۔
صفائی کے اس عمل سے ایک نقصان یہ ہوا کہ انڈوں کے اوپر موجود قدرتی پرت کو دھونے سے نقصان ہونے لگا اور انڈے خراب ہونے لگے، باہر کے بیکٹیریا کو یہ موقع ملنے لگا کہ وہ انڈے کی حفاظتی پرت کی عدم موجودگی کا فائدہ اٹھاتے ہوئے انڈوں کو خراب کردے۔ اس مشکل صورتحال کو اس طرح حل کیا گیا کہ انڈوں کو فریج میں رکھا جانے لگا اور تب سے اب تک انڈوں کو فریج میں ہی رکھا جاتا ہے۔
اب آپ لوگ اوپر کئے گئے سوال کا جواب جاننا چاہ رہے ہوں گے آیا انڈوں کو فریج میں رکھیں یا نہیں تو اس کا جواب بہت سادہ ہے۔ اگر آپ اپنے لئے انڈے کسی بیکری، دکان،اسٹور مارکیٹ سے خرید کر لائیں ہیں تو انہیں لازماً فریج میں رکھیں۔
اگر انڈے فریج میں موجود ہیں تو پکانے سے اُنہیں چند منٹ قبل نکال کر تو استعمال کیا جاسکتا ہے لیکن اگر زیادہ دیر کے لئے کمرے کے درجہ حرارت پر رکھ دیا جائے تو اس سے انڈوں کے خراب ہونے کا امکان بڑھ جاتا ہے لہٰذا انہیں فریج میں ہی رہنے دیا جائے اور استعمال سے کچھ وقت قبل فریج سے نکالیں۔
اگر آپ اپنے لئے انڈے کسی پولٹری فارم سے خرید کر لائیں ہیں تو آپ چاہیں تو ایسے انڈوں کو کمرے کے درجہ حرارت پر رکھ کر استعمال کرسکتے ہیں۔