کام کاج چھوڑ کر پیار محبت میں پڑے ہوئے ہیں۔۔ کرن ناز ڈرامہ 'پرورش' بنانے والوں پر برس پڑیں! ٹھیک ٹھاک سنا دی

Kiran Naz Calls Out Parwarish Drama Makers For Showing Child Romance

اے آر وائی ڈیجیٹل کا معروف ڈرامہ پرورش، جو ابتدا میں والدین اور نوجوان بچوں کے درمیان جذباتی اتار چڑھاؤ اور تعلقات کی عکاسی پر سراہا گیا، اب تنقید کی زد میں ہے۔ ناظرین کا کہنا ہے کہ یہ سیریل اب تربیت سے بھٹک کر محبت، رومانس اور مغربی نظریات کی تشہیر میں مصروف ہو چکا ہے۔

اینکر کرن ناز، جنہوں نے ہمیشہ معاشرتی مسائل پر آواز بلند کی، اس بار پرورش کے خلاف بول پڑیں۔ ٹک ٹاک ویڈیو میں انہوں نے نہایت واضح اور سخت انداز میں اپنے تحفظات کا اظہار کیا۔

ہمیں دکھایا جا رہا ہے کہ کم عمر لڑکے لڑکیاں ایک دوسرے سے لپٹ رہے ہیں، قریب آ رہے ہیں، اور یہ سب ٹی وی پر ایک عام بات بنا دیا گیا ہے۔ میں نے بہت سنا تھا کہ یہ ایک اچھا ڈرامہ ہے، جب دیکھا تو حیرت کا جھٹکا لگا۔ یہ سب کیا ہے؟ کہاں گئی تربیت؟ کہاں گئی اقدار؟

انہوں نے مزید کہا، نکاح سب کچھ نہیں، زندگی میں اور بھی مقاصد ہوتے ہیں جو نوجوانوں کو سکھائے جا سکتے ہیں۔ محبت کس سے ہے، کس کو چاہنا ہے؟ یہ سب باتیں بچے کب سے ڈراموں میں دیکھنے لگے؟

کرن ناز نے ماضی کے ڈرامے مائی ری کا حوالہ بھی دیا، جس پر انہوں نے پہلے بھی اعتراض کیا تھا۔ ان کا کہنا تھا، پہلے کم عمری کی شادی دکھائی، پھر طلاق، اور اب پرورش میں نوجوان ڈاکٹر اور موسیقار اپنے خوابوں کو چھوڑ کر ایک دوسرے کی باہوں میں گم ہو رہے ہیں۔ آخر کون سی تربیت ہے یہ؟

ان کا سوال تھا، کیا ڈرامہ بنانے سے پہلے کوئی سوچ بچار، کوئی فکری نشست، کوئی ذمہ داری کا احساس نہیں ہوتا؟

سوشل میڈیا پر عوام نے کرن ناز کی آواز کو سراہا اور ان کا شکریہ ادا کیا کہ انہوں نے بر وقت لب کشائی کی۔ صارفین کا کہنا ہے کہ پرورش جیسے ڈرامے معاشرے کو گمراہ کر رہے ہیں، خاص طور پر دیہی علاقوں میں جہاں لوگ اسکرین پر دیکھے گئے ہر کردار کو حقیقت سمجھ بیٹھتے ہیں۔

کیا ہمارا میڈیا اب تربیت کے بجائے تسکین بیچنے لگا ہے؟ کیا ہم اپنے بچوں کو خواب سکھا رہے ہیں یا بے راہروی؟ فیصلہ آپ کا۔