Ghar Ki Safai Karne Ka Tarika

بڑی عید میں کچھ ہی دن باقی ہیں اور گھر کی صفائی کرنی ہے۔۔ تو آزمائیں چند ایسی خاص ٹپس جن سے ہو جائے صفائی کا عمل آسان اور تیز
بڑی عید کی آمد آمد ہے اور اس عید تو گھر پر مہمان بھی خوب آئیں گے ایسے میں گھر گندا چھوڑ دینا ممکن نہیں، اب کریں گھر کے پنکھوں، دیواروں اور قالین وغیرہ کی صفائی ہماری بتائی ہوئی ٹپس سے جو بنائیں آپ کا کام آسان۔

• گھر کی صفائی کی چند ٹپس

• پنکھا صاف کرنے کے لئے
ایک بالٹی گرم پانی لیں اس میں چار چمچ ہائیڈروآکسائیڈ (بازار میں آسانی سے دستیاب ہے) شامل کریں، پھر اس میں ایک تولیے کو 5 منٹ کے لئے ڈبو دیں، اس کے بعد کپڑے دھونے والا سرف اس پانی میں مکس کریں، اب ان تولیوں کو پنکھے کے پروں پر رگڑیں 5 منٹ تک ساری پنکھڑیوں پر رگڑیں، پھر صاف کپڑے سے پنکھے کو صاف کر لیں، لیجیئے ہوگئے آپ کے گندے سے گندے پنکھے باآسانی صاف۔

• دیواروں کی صفائی کے لئے
دیواروں کی صفائی کے لئے ایک صاف کپڑے کو ٹھنڈے پانی میں بھگو کر اچھی طرح نچوڑ لیں پھر اس پر سہاگہ (بورکس) چھڑک کر دیواروں اور دروازوں کے دھبوں پر رگڑیں، داغ دھبے فوری صاف ہو جائیں گے۔

• جالے صاف کرنے کے لئے
ایک کپڑے کو نیم گرم پانی میں ڈبوئیں اور اس میں ہلکا سا ڈٹرجنٹ ڈال کر مکس کریں، اب اس کپڑے سے ایک مرتبہ جالے صاف کریں، پھر ایک بالٹی میں پانی ڈالیں اور ساتھ ہی کالا تیل ڈال کر ہلائیں، اس میں کپڑا ڈبوئیں اور دیواروں کے کونے صاف کرلیں، ایسا کرنے سے جالے صاف ہو جائیں گئے اور دوبارہ نہیں لگیں گے۔

• قالین صاف کرنے کے لئے
قالین سے نشانات صاف کرنے کے لئے آدھ کپ سرکے میں دو چائے کے چمچ نمک ڈال لیں اور اس محلول کو نشانات والی جگہ ڈال دیں پھر خشک ہونے تک انتظار کریں، اگر نشانات گہرے ہوں تو اس محلول میں دو چائے کے چمچ بوریکس ملا کر اسی طریقے سے استعمال کریں قالین چمک جائے گا۔