موت کو بھی مذاق بنا کر رکھ دیا ہے.. پونم پانڈے نے اپنی موت کی جھوٹی خبر کیوں پھیلائی؟ اداکارہ کی ویڈیو دیکھ کر صارفین نے کھری کھری سنادی

"ان لوگوں نے تو موت کو بھی مذاق بنا کر رکھا ہے"

"ہمیں تو پہلے ہی اندازہ تھا کہ یہ صرف پبلسٹی اسٹنٹ ہے"

"جب کام نہیں ملتا تو اسی طرح کے ڈرامے کرتی ہیں"

یہ کہنا ہے سوشل میڈیا صارفین کا جو بھارتی اداکارہ پونم پانڈے کی جانب سے کی گئی اپنی موت کی جھوٹی خبر پھیلانے پر شدید برہم ہیں.

واضح رہے کہ گزشتہ دوز پونم پانڈے کے انسٹاگرام اکاؤنٹ پر ان کی موت کی خبر ڈالی گئی جس کے بعد بڑی تعداد میں لوگوں نے افسوس کا اظہار کیا. البتہ آج پونم نے ویڈیو بیان جاری کر کے اپنی موت کی تردید کر دی اور اسے ایک مہم قرار دیا.

پونم پانڈے نے کہا کہ 'بدقسمتی سے میں ان ہزاروں خواتین کے حوالے سے نہیں بول سکتی جو سروائیکل کینسر کی وجہ سے اپنی جانوں سے ہاتھ دھو بیٹھتی ہیں، وہ اس لیے نہیں مرتیں کہ وہ کچھ کر نہیں سکتیں بلکہ اس لیے جان گنوا بیٹھتی ہیں کیونکہ انہیں معلوم نہیں ہے کہ بیماری کی تشخیص کے بعد کیا کرنا ہے. میں آپ کو بتانا چاہتی ہوں کہ دوسرے کینسر کی طرح اس کینسر کا بھی علاج ہے، جس کے لیے آپ سب کو ٹیسٹ کروانا اور اس کی ویکسین کروانا ضروری ہے اور ہمیں یہ باور کروانا ہے کہ اس سرطان کی وجہ سے مزید زندگیاں ضائع نہ ہوں"

اتنا ہی نہیں بلکہ اداکارہ نے موت کی جھوٹی خبر پھیلانے پر لوگوں سے معافی بھی مانگی. البتہ سوشل میڈیا پر عوام موت کا جھوٹا ڈرامہ رچانے پر پونم پر سخت برہم ہیں.