Homemade Herbal Tea Recipe in Urdu

اجزاء:
ہماری خوراک ہمارے حسن و خوبصورتی اور صحت کو برقرار رکھنے میں اہم کردار ادا کرتی ہے۔ ہم جو کچھ کھاتے ہیں وہ ہمارے چہرے پر نظر آجاتا ہے۔ اچھی متوازن غذا ہمارے چہرے پر حسن بن کر جھلکتی ہے۔ جبکہ مرغن اور غیر متوازن غذا کے کھانے والے کا چہرہ بھی الگ ہی پتہ چل جاتا ہے، صحت کی خرابی کا حال بھی چہرہ بتادیتا ہے ،اسی لئے لوگ چہرے کو خوبصورت بنانے کے لئے ہر جتن کر لیتے ہیں۔ اگر آپ بھی یہ چاہتی ہیں کہ آپ کی اندرونی خوبصورتی آپ کے چہرے سے عیاں ہو تو اس کے لئے تھوڑی سی کوشش کرنی پڑے گی،اس کے لئے آپ کو اپنے طرز زندگی میں بدلاؤ لانا ہوگا ۔ صحت مند لائف اسٹائل اپنانا ہو گا، چکنائی کا استعمال کم سے کم کریں، پانی زیادہ پئیں ، کچی سبزیاں زیادہ کھائیں، مرغن غذاؤں کی عادت چھوڑ دیں۔ ایکسرسائز ضرور کریں۔اپنا خیال رکھیں ،اپنے لئے وقت نکالیں ۔ آج ہم آپ کے لئے یہاں ایک ایسی ہربل چائے لے کر آئے ہیں جس میں موجود اینٹی آکسیڈنٹس آپ کی جلد کو خوبصورت اور چمکداربناتے ہیں،کھانے کو ہضم کرنے میں مددگار ثابت ہوتے ہیں،فری ریڈیکلز سے لڑنے کی صلاحیت پیدا کرتے ہیں۔
اس کے اجزاء میں شامل ہیں:
پودینہ 6 سے 8 عدد
کالی مرچ 3 سے 4 عدد
گلاب کی پتیاں 1 ٹیبل اسپون
ادرک 1 انچ کا ٹکڑا
لیموں کے قتلے 2 سے 3
پان کا پتہ چھوٹا سا ٹکڑا

ایک پین میں دو گلاس پانی چڑھائیں۔
اب اس میں کالی مرچ، گلاب کی سوکھی ہوئی پتیاں، اور آرگینک گرین ٹی ڈالیں۔
اب اس کو تھوڑی دیر پکنے دیں، پھر اس میں ادرک اور پان کے پتے کا چھوٹا سا تکڑا توڑ کر ڈال دیں۔
پھر پودینے کی پتیاں بھی ڈالیں ،اس کے ساتھ لیموں کے ایک دو قتلے بھی ڈال دیں۔
اب اس چائے کو اتنا پکائیں کہ پانی ایک گلاس رہ جائے۔
لیجئے آپ کی بہترین ہربل چائے تیار ہے۔ ایک چمچ شہد ڈال کر پئیں ۔ یہ آپ کے نظام ہضم کو تیز کرتی ہے جس سے وزن کم کرنے میں مدد ملتی ہے اس کے علاوہ جلد کو صاف شفاف اور چمکدار بناتی ہے ،بالوں کی نشونما میں کام کرتی ہے۔ آزمائش شرط ہے۔ استعمال کے بعد ہمیں اپنی آراء سے آگاہ کیجیے گا۔