10طرح کے اُبٹن !10طرح کے فائدے

اُبٹن قدیم زمانے سے استعمال ہوتا چلا آرہاہے جو باعث تعجب نہیں ہے اسے ہماری دادیاں اور نانیاں مدت سے استعمال کرتی آرہی ہیں ۔ اسے اس کی خصوصیات کے پیش نظر سالہا سال سے استعمال کیا جا رہا ہے اور آج بھی کوئی شادی اُبٹن کے بغیر ادھوری ہے شادی کے علاوہ بھی بہت سی خواتین خوبصورتی میں اضافہ کے لئے اس کا استعمال پابند ی سے کرتی ہیں ۔
اُبٹن میں ہلدی کا استعمال ہوتا ہے جو صحت کے اعتبار سے بے حد مفید ہے ۔
ذیل میں آپ کی آسانی کے لئے چند آزمودہ اور آسان اُبٹن گھر میں ہی بنانے کے ٹوٹکے بتار رہے ہیں جن کے استعمال سے آپ رنگ برنگی کریموں اور مہنگے ٹریٹمنٹ سے نجات پا سکتے ہیں ۔

داغ دھبوں اور چھائیوں کے لئے :
ہلدی اور گیہوں کا آٹا ہم وزن گائے کے کچے دودھ میں ملا کر چہرے پر بطور اُبٹن ملتے ہیں ۔
یہ نہ صرف رنگ صاف کرتا ہے بلکہ داغوں اور چھائیوں کو دور کرتا ہے ۔
لیکن ہلدی گھر کے مصالحے والی نہ لیں ۔

چہرے کے نکھار کے لئے :
حُسن یوسف، صندل پاؤڈر، گل انار ، آکاش بیل 10،10گرام لے کر اس میں ایک تولہ روغن خس اور 100گرام اُبٹن اچھی طرح کو ٹ کر مکس کرکے چھان لیں ۔
دودھ یا عرق گلاب میں ملا کر آدھے گھنٹے لگانے کے بعد چہرہ دھولیں ۔

گھر کا اُبٹن :
اُبٹن بنانے کے لئے اَرجُن کی چھال ، تُرمَس کے بیج، بادام، ہلدی ، کپور کچری ہم وزن لے کر پہلے سب کو کوٹ لیں ۔
اس کے بعد پیس لیں ، اگرآپ خشک جلد کی حامل ہیں تو بادام کا تیل اور آئلی اس کے لئے عرق گلاب سے مکس کرکے لگائیں ۔

رنگ گورا کرنے کے لئے :
ایک چمچ مونگ کی دال کا پاؤڈر اور حسن یوسف ایک چمچ اور دھی تین چمچ لے کر پیسٹ بنالیں اور منھ دھوکر لگالیں ۔
بارہ سے پندرہ منٹ بعد پانی کا اسپرے کریں اور ہلکے ہاتھ سے رگڑ کردھولیں ۔

ڈرائے اسکن کیلئے :
دو کھانے کے چمچ پسے ہوئے بادام اور دو کھانے کے چمچ پسے ہوئے چاول ہم وزن لے کر دودھ سے مکس کر پانچ منٹ کے لئے رکھ دیں ۔
پھر چہرے پر لگا کر بیس منٹ چھوڑدین پورے جسم پر کہیں بھی لگا سکتے ہیں ۔ اس سے آپ کی جلد کا رنگ ہلکا، بلیک ہیڈ اور ڈیڈ اسکن کا خاتمہ ہوجائے گا۔

ایکنی کے لئے :
ایک آلو اور تقریباًایک چمچ کھیرا چھیل کر کدوکش کرکے پیسٹ بنالیں ۔
پھر ایک چمچ لیموں کا رس اور ایک چمچ ہی بیسن ڈال کر مکس کرلیں اور 25منٹ لگانے کے بعد دھولیں ۔

سرد موسم کا اُبٹن :
خشخاش یا حسن یوسف، ورس، السی کی کھل ، بادام ، ہلدی ، گوندھ کتیرا، ان تمام اجزاء کو ہم وزن لے کر پیس لیں اگر چھائیں اور پگمنٹیشن ہے تو اس میں مولی کے بیج پیس کرملالیں ۔

فوری نکھار کا اُبٹن ہر جلد کے لئے :
آمبہ ہلدی ، گوند کتیرا، کیسر، حسن یوسف ، تمام اجزاء کو پیس کر دودھ سے مکس کرکے تھوڑا سا بادام کا تیل ملا کر لگالیں ۔

جلد کی صفائی کا اُبٹن :
چنبیلی کا کلی اور بیسن ایک ایک کپ، پسی ہلدی دو چمچ ، پسی دار چینی ایک چمچ ، ان سب کو مکس کرکے رکھ لیں ۔
جب لگانا ہو تو ایک چمچ نکال کر چند قطرے لیموں اور حسب ضرورت پانی ملا کر استعمال کریں ۔

ڈرائی اسکن کے لئے :
بیسن دو کھانے کے چمچ، چاول کا آٹاآدھ کھانے کا چمچ ، دھی ایک کھانے کا چمچ، ہلدی آدھی چائے کا چمچ، لیموں کا رس دو سے تین قطرے ، ناریل کا تیل آدھ چائے کا چمچ، شہد آدھا کھانے کا چمچ ان تمام اجزاء کو مکس کرکے پیسٹ بنالیں ۔
دس سے پندرہ منٹ چہرے پر لگا کر نیم گرم پانی سے دھولیں ۔
ہفتے میں دو دفع استعمال کرسکتے ہیں ، اس سے آپ کا رنگ صاف ، جلد نرم وملائم اور داغ دھبے بھی دور ہونگے ۔

ان تمام ٹوٹکوں میں سے اپنی جلد کے مطابق کوئی بھی ٹوٹکہ آپ استعمال کر سکتی ہیں ، اگر آپ اُبٹن کا مسلسل استعمال کریں تو اس کے دیگر فوائد بھی حاصل کرسکتی ہیں ، کوئی بھی مسئلہ ایک دفعہ کے استعمال سے حل نہیں ہوتا، ہر کام کے لئے مستقل مزاجی کی ضرورت ہوتی ہے ۔