ان کا مقصد صرف مردوں سے نفرت کروانا ہے ۔۔ رابعہ کلثوم، عورت مارچ کے نام پر خواتین کو بھڑکانے کے خلاف بول پڑیں

پاکستان میں عورت مارچ کا نظریہ کافی سالوں سے بہت غلط طریقے سے پیش کیا جارہا ہے جس کی مخالفت خود کافی خواتین نے کی ہے۔ اور اب حال ہی میں اداکارہ رابعہ کلثوم بھی اس موضوع پر اپنی رائے دیتی ہوئی نظر آئیں۔

پاکستانی اداکارہ اور انفلوئنسر رابعہ کلثوم نے حال ہی میں ایک پوڈ کاسٹ میں شرکت کی جہاں انہوں نے فیمنزم اور عورت مارچ سے متعلق گفتگو کرتے ہوئے کہا ہے کہ، ہمارا فیمنزم اور عورت مارچ صرف مردوں سے نفرت تک محدود ہو کر رہ گیا ہے۔

ان کا کہنا تھا کہ، فیمنزم ایک اہم اور وسیع موضوع ہے لیکن جس طرح کے نعرے یہاں عورت مارچ میں لگائے جاتے ہیں اس سے خواتین کے خلاف تشدد مزید بڑھ سکتا ہے۔

اپنی بات کو جاری رکھتے ہوئے انہوں نے کہا کہ، پلے کارڈ پر لکھا ہوتا ہے کہ 'اپنا موزہ خود ڈھونڈو'، 'کھانا خود گرم کرو' وغیرہ، اس طرح کی باتیں غلط طریقے سے آگے کی طرف جارہی ہیں، اگر ایک گاؤں کی خاتون یہ پلے کارڈ اٹھا لے تو اس کا شوہر اس پر مزید تشدد کرے گا۔

رابعہ کلثوم نے کہا کہ، ہمیں اس طرح کے پلے کارڈز سے باہر آنا چاہیے، فیمنزم ایک بہت بڑا مقصد ہے لیکن کچھ لوگوں نے اس کا مقصد ہی ہی تبدیل کردیا ہے۔

ان کا کہنا تھا کہ، فیمنزم کو وسیع تناظر میں دیکھنا چاہئے یہ اسے خواتین کی تعلیم اور ان کی پیشہ ورانہ بہتری کیلئے استعمال کرنا چاہئے۔