ہم جٹ ہیں، پہلے ٹیکسی چلاتا تھا اور.. رندیپ ہودا کے ماضی کی سخت زندگی سے متعلق انکشافات

"90 کی دہائی کی بات ہے. اس زمانے میں، میں ایک ماہر ڈرائیور ہوا کرتا تھا"

یہ کہنا ہے بھارت سے تعلق رکھنے والے نامور اداکار رندیپ ہودا کا جنھوں نے حال ہی میں بھارتی میڈیا سے گفتگو کرتے ہوئے اپنے ماضی کی کٹھنائیوں کا ذکر کیا.

رندیپ ہودا نے انکشاف کیا ہے کہ اداکاری کی دنیا میں قدم رکھنے سے پہلے وہ آسٹریلیا کے شہر ملبورن میں پڑھتے تھے اور گزر و اوقات کے لئے ٹیکسی چلاتے تھے. اتنا ہی نہیں بلکہ وہ ویٹر کی نوکری بھی کرچکے ہیں.

اپنی ڈرائیونگ اسکلز کے بارے میں رندیپ ہودا کا کہنا ہے کہ میں جانتا تھا کن جگہوں پر مسافر ملیں گے. نائٹ کلب کھلنے اور بند ہونے کے کیا اوقات ہیں اور میں ان باتوں پر غور کرتا تھا کہ لوگ کس وقت دفاتر سے باہر گھر کے لئے نکلیں گے. یہی وجہ ہے کہ مجھے باقی ٹیکسی ڈرائیوروں سے زیادہ کماتا تھا.

اپنی گفتگو جاری رکھتے ہوئے رندیپ نے بتایا کہ وہ ایک چینی ریسٹورینٹ میں ویٹر کی حیثیت سے کام بھی کرچکے ہیں. اس وقت ایسا لگتا تھا جیسے کوئی مستقبل نہیں ہے. اگرچہ لگتا تو ابھی بھی ایسا ہی ہے لیکن اس وقت میں ڈرتا نہیں تھا اور اب بھی نہیں ڈرتا. میں جٹ ہوں اور ہم کہتے ہیں کہ 'جو ہوگا دیکھا جائے گا'۔